तपाईँ सुन्दै हुनुहुन्छः

राष्ट्रपति भण्डारी ढाकामाः आजै महत्वपूर्ण भेटवार्ता(फोटो फिचर)

बङ्गलादेशको राजकीय भ्रमणका सिलसिलामा ढाकास्थित हजरत सहजलाल अन्तरराष्ट्रिय विमानस्थलमा राष्ट्रपति विद्यादेवी भण्डारी । तस्बिर : प्रकाश सिलवाल/रासस

ढाका। राष्ट्रपति विद्यादेवी भण्डारी मित्रराष्ट्र जनवादी गणतन्त्र बङ्गलादेशको राजकीय भ्रमणका सिलसिलामा आज बिहान यहाँको राजधानी ढाकामा आइपुग्नुभएको छ ।

बङ्गलादेशको राजकीय भ्रमणका सिलसिलामा राष्ट्रपति विद्यादेवी भण्डारी राष्ट्रिय शहीद स्मृति, सभारमा शहीदप्रति श्रद्धाञ्जलिपछि त्यहाँस्थित आगन्तुक पुस्तिकामा हस्ताक्षर गर्दैै । तस्बिर: प्रकाश सिलवाल/रासस

बङ्गलादेशका राष्ट्रपिता शेख मुजिबुर रहमानको जन्मशताब्दी विशेष समारोहका अवसरमा बङ्गलादेशी राष्ट्रपति मोहम्मद अब्दुल हमिदका मैत्रीपूर्ण निमन्त्रणामा राष्ट्रपति भण्डारी बिहान स्थानीय समयानुसार १० बजे ढाकास्थित हजरत सहजलाल अन्तरराष्ट्रिय विमानस्थलमा आइपुग्नुभएको हो ।

बङ्गलादेशको राजकीय भ्रमणका सिलसिलामा राष्ट्रपति विद्यादेवी भण्डारी ढाकामा स्वागत समारोहपछि राष्ट्रिय शहीद स्मृति, सभारमा शहीदप्रति श्रद्धाञ्जलि अर्पण गर्दै । तस्बिर :प्रकाश सिलवाल/रासस

राष्ट्रिय ध्वजावाहक नेपाल वायुसेवा निगम (नेपाल एयरलाइन्स) को विशेष विमानबाट यहाँ आइपुग्नुभएका राष्ट्रपति भण्डारीलाई समकक्षी हमिदले विमानस्थलमा स्वागत गर्नुभयो । राष्ट्रपति भण्डारीलाई विमानाट ओर्लेलगत्तै बङ्गलादेशका लागि नेपाली राजदूत डा वंशीधर मिश्रले पनि स्वागत गर्नुभएको थियो ।

बङ्गलादेशको राजकीय भ्रमणका सिलसिलामा राष्ट्रपति विद्यादेवी भण्डारी आज बिहान नेपाल वायु सेवा निगमको विशेष विमानबाट यहाँको राजधानी ढाकास्थित हजरत सहजलाल अन्तरराष्ट्रिय विमानस्थलमा ओर्लिएपछि आयोजित ‘गार्ड अफ अनर’ सम्मान ग्रहण गर्दै । तस्बिर:प्रकाश सिलवाल/रासस

राष्ट्रपति भण्डारीलाई विमानस्थलमा २१ तोपको सलामीसहित ‘गार्ड अफ अनर’ दिइयो । राष्ट्रपति भण्डारीले त्यसपछि यहाँको राष्ट्रिय शहीद स्मृति, सभारमा शहीदप्रति श्रद्धाञ्जलि अर्पण गर्नुभयो । त्यहाँ उहाँले वृक्षरोपण पनि गर्नुभयो । राष्ट्रपति भण्डारी हाल आवासका लागि प्रबन्ध गरिएको इन्टरकन्टिनेन्टल होटेलमा आइपुग्नुभएको छ ।

बङ्गलादेशको राजकीय भ्रमणका सिलसिलामा राष्ट्रपति विद्यादेवी भण्डारी आज बिहान नेपाल वायु सेवा निगमको विशेष विमानबाट यहाँको राजधानी ढाकास्थित हजरत सहजलाल अन्तरराष्ट्रिय विमानस्थलमा ओर्लँदै । तस्बिर : प्रकाश सिलवाल/रासस

राष्ट्रपति भण्डारी आजै बङ्गलादेशका राष्ट्रपति हमिदसँग द्विपक्षीय भेटवार्ता गर्नाका साथै द्विपक्षीय सम्झौता समारोहमा सहभागी हुनुहुनेछ । बङ्गलादेशका प्रधानमन्त्री शेख हसिनाले पनि राष्ट्रपति भण्डारीसँग आजै शिष्टाचार भेट गर्ने कार्यक्रम छ ।

बङ्गलादेशको राजकीय भ्रमणका सिलसिलामा राष्ट्रपति विद्यादेवी भण्डारी राष्ट्रिय शहीद स्मृति, सभारमा रुख रोप्दै । तस्बिर :प्रकाश सिलवाल/रासस

राष्ट्रपतिको भ्रमण दलमा राष्ट्रपतिकी सुपुत्री उषाकिरण भण्डारी, परराष्ट्रमन्त्री प्रदीपकुमार ज्ञवाली, राष्ट्रपतिका सूचना तथा सञ्चारविज्ञ टीकाप्रसाद ढकाल, नेपाल प्रज्ञा–प्रतिष्ठानका कुलपति गङ्गाप्रसाद उप्रेती, राष्ट्रपतिको कार्यालयका सचिव डा हरि पौडेल, संस्कृति, पर्यटन तथा नागरिक उडड्यन मन्त्रालयका सचिव यादवप्रसाद कोइराला, परराष्ट्र मन्त्रालयका सचिव भरतराज पौडेल, उद्योग, वाणिज्य तथा आपूर्ति मन्त्रालयका सचिव दिनेश भट्टराई, राष्ट्रपतिका प्रमुख स्वकीय सचिव डा भेषराज अधिकारीलगायत हुनुहुन्छ ।

बङ्गलादेशको राजकीय भ्रमणका सिलसिलामा ढाका आइपुग्नु भएका राष्ट्रपति विद्यादेवी भण्डारीलाई हजरत सहजलाल अन्तर्राष्ट्रिय विमानस्थलमा स्वागत गर्दै बङ्गलादेशका राष्ट्रपति मोहम्मद अब्दुल हमिद । तस्बिर ; प्रकाश सिलवाल/रासस

यस्तै परराष्ट्र मन्त्रालयका सहसचिव यज्ञबहादुर हमाल, मन्त्रालयका शिष्टाचार महापाल डा दुर्गाबहादुर सुवेदी, राष्ट्रपतिका निजी चिकित्सक डा कैलाश भण्डारीलगायत ढाकास्थित नेपाली दूतावासका समेत गरी ५४ जना भ्रमण दलमा हुनुहुन्छ ।

बङ्गलादेशको राजकीय भ्रमणका सिलसिलामा राष्ट्रपति विद्यादेवी भण्डारीसँँग आज ढाकास्थित होटेल कन्टिनेन्टलमा शिष्टाचार भेटवार्ता अघि स्वागत गर्दैै बङ्गलादेशका प्रधानमन्त्री शेख हसिना । तस्बिर: प्रकाश सिलवाल/रासस

भ्रमण दलमा कलाकार अशोकुमार राईका नेतृत्वमा सांस्कृतिक कलाकर्मीको १९ सदस्यीय टोली तथा तीन सञ्चारकर्मी पनि छन् ।रासस

 

प्रतिक्रिया राख्नुहोस्

Back to top button