तपाईँ सुन्दै हुनुहुन्छः

विद्यालयलाई जग्गा किन्न २१ लाख सङ्कलन

त्रिशूली। रसुवाको पहिलो विद्यालय निलकण्ठ माध्यमिक विद्यालय ‘नमूना विद्यालय’मा छनोट भएसँगै नयाँ भवन निर्माण गर्न जग्गा खरिदको लागि झण्डै २१ लाख जुटेको छ ।

भवन बनाउन आवश्यक पाँच रोपनी जग्गा खरिद गर्न विद्यालयका पूर्व विद्यार्थीको पहलमा सुरु गरिएको चन्दा सङ्कलनको एक महिनामा रु.२० लाख ९२ हजार जम्मा भएको प्रचारप्रसार विभागका संयोजक शशी डङ्गोलले जानकारी दिनुभयो । उतरगया गाउँपालिका–५ घर भएर हाल बेल्जियम निवासी मीरा डङ्गोलले रु.एक लाख एक सय दिएर सुरु भएको सो अभियानमा गाउँपालिका लेखनाथ अधिकारीले एक लाख एक हजार १५५ सहयोग गर्नुभएको छ । हालसम्म १९८ दाताबाट सहयोग जुटेको छ । रकम सङ्कलन अभियान अहिलेको निषेधाज्ञाको समयमा पनि जारी रहेको शिक्षक गणेश श्रेष्ठले बताउनुभयो ।

विसं. २००७ मा स्थापना भएको उक्त विद्यालयमा भवन र आवासीय संरचना बनाउन नेपाल सरकारबाट एक करोड ५० लाख बढी रकम बजेट सुनिश्चित भएको छ । सोही कारण जग्गाको जोहा गर्न लागिएको हो । स्थानीय वसन्त आचार्यसँग चार रोपनी जग्गा ७६ लाख ८० हजारमा खरिद गर्न दाताबाट सङ्कलन भएको रकमबाट विद्यालयले १० लाख अग्रिम भुक्तानी दिइसकेको व्यवस्थापन समितिका अध्यक्ष ओमप्रसाद आचार्यले जानकारी दिनुभयो ।

जग्गा खरिद सहित पूर्वविद्यार्थीले स्मारक, वालउद्यान लगायतका संरचना निर्माण गर्न सहयोग अभियान चलाएको विदुर निवासी पूर्व विद्यार्थी मच्छिन्द्र नरसिंह प्याकुरेलले जानकारी दिनुभयो । उहाँका अनुसार अभियानमार्फत एक करोड सङ्कलन गर्ने लक्ष्य छ । निलकण्ठ मावि रसुवा र नुवाकोट दुवै जिल्लाको विद्यार्थीको लागी पायक पर्ने छ ।

प्रतिक्रिया राख्नुहोस्

Back to top button