तपाईँ सुन्दै हुनुहुन्छः

सुरक्षाकर्मीका लागि ५ लाख बराबरको स्वास्थ्य सुरक्षा सामग्री 

भद्रपुर, झापा ।  तीव्र रुपमा फैलिइरहेको दोस्रो लहरको कोरोना भाइरसको संक्रमण रोकथाम तथा नियन्त्रणका लागि अग्र मोर्चामा खटिने गरेका सुरक्षाकर्मीहरूका लागि झापा जिल्ला सहकारी सङ्घले स्वास्थ्य सुरक्षा सामग्री उपलब्ध गराएको छ ।
संघका अध्यक्ष गणेश ढकाल, वरिष्ठ उपाध्यक्ष महेन्द्रकुमार गिरी, सचिव भवानीप्रसाद दंगाल र जिल्ला बचत तथा ऋण सहकारी सङ्घ झापाका अध्यक्ष घनश्याम अधिकारीको टोलीले आज जिल्ला प्रशासन कार्यालय पुगेर तीनै अङ्गका सुरक्षाकर्मीहरूका लागि ५ लाख रुपैयाँ बराबरको स्वास्थ्य सुरक्षा सामग्री प्रमुख जिल्ला अधिकारी श्रवणकुमार तिमिल्सिनालाई हस्तान्तरण गरेको हो ।
त्यहाँ झापाका प्रहरी उपरीक्षक सानुराम भट्टराई, नेपाली सेना चारआलीका प्रमुख सेनानी गौरवजंग थापा र सशस्त्र प्रहरी निरीक्षक रमेशकुमार पाण्डेको पनि उपस्थिति थियो ।
स्वास्थ्य सम्बन्धी मापदण्ड पालना गर्दै संक्षिप्त कार्यक्रमका बीच संघका अध्यक्ष गणेश ढकालले प्रजिअ तिमिल्सिनालाई सामग्री हस्तान्तरण गर्नुभयो ।
सङ्घले सामाजिक उत्तरदायित्व अन्तर्गत स्वास्थ्य सामग्री सहयोग गरेको सचिव दंगालले जानकारी दिनुभयो ।
सङ्घले १० हजार थान सर्जिकल मास्क, ६० थान पिपिई सेट, ६ हजार सेट ग्लोब्स, एक हजार थान फेसशील्ड र १८०० लिटर स्यानिटाइजर उपलब्ध गराएको संघका वरिष्ठ उपाध्यक्ष गिरीले बताउनुभयो ।
स्वास्थ्य सुरक्षा सामग्रीको अभाव हुने अवस्थामा पुगेको बेला सङ्घले गरेको यो सहयोगले सुरक्षाकर्मीहरूलाई कोरोना रोकथाम तथा नियन्त्रणका लागि अग्र मोर्चामा खटिएर काम गर्न निकै सहयोग पुग्ने भन्दै सहयोगका लागि सङ्घलाई धन्यवाद दिएका छन् ।
अघिल्लो वर्ष देखिएको कोरोना भाइरसभन्दा अहिले फैलिएको नयाँ भेरियन्टसहितको कोरोना भाइरस बढी सङ्क्रामक भएकोले सबैमा उत्तिकै जोखिम रहेको अवस्थामा सु्रक्षाकर्मीहरुको स्वास्थ्य सुरक्षालाई ध्यानमा राख्दै स्वास्थ्य सामग्री सहयोग गरिएको सङ्घले जनाएको छ ।
झापा जिल्ला सहकारी सङ्घले गत वर्ष पनि जिल्लाका प्रारम्भिक सहकारी संस्थाहरूको सहयोगमा जिल्लाका सबै स्थानीय तहमा कोरोनाका कारण सङ्कटमा परेका नागरिकहरूलाई राहतका लागि नगद सहयोग गरेको थियो भने झापाको कनकाईमा नागरिक स्तरबाट स्थापित पीसीआर परीक्षण ल्याबका लागि २५ लाखभन्दा बढी रकम जुटाएको थियो ।
सङ्घले यस पटक कोरोना भाइरस सङ्क्रमितहरूलाई निमोनिया हुने जोखिम अत्यधिक देखिएकोले सङ्क्रमितहरूको एक्स–रे गर्न २५ लाख रुपैयाँ बराबरको अत्याधुनिक एक्स–रे मेशिन पनि ल्याउन लागेको अध्यक्ष ढकालले जानकारी दिनुभयो । सो मेसिन झापाकै एक अस्पताललाई हस्तान्तरण गरिने पनि उहाँले बताउनुभयो ।

प्रतिक्रिया राख्नुहोस्

Back to top button