तपाईँ सुन्दै हुनुहुन्छः

छोराछोरीले पठाएको रकमले अस्पताललाई अक्सिजन

चितवन । बागमती प्रदेश सभा सदस्य गीता वाग्लेले आफ्ना छोरी र छोराले आमा खुवाउने औँसीमा अस्ट्रेलियाबाट पठाएको रकमले चितवनको एक अस्पताललाई अक्सिजन सिलिन्डर दिनुभएको छ । वाग्लेले ईच्छाकामना गाउँपालिकाको मुस्लिनमा रहेको मुस्लिन हाइवे हस्पिटललाई पाँच थान सिलिन्डर र एउटा ट्रली उपलब्ध गराउनुभएको हो ।
वाग्लेले हस्पिटलका अध्यक्ष रामबहादुर लामासँगै मणिरत्न शाक्य, मुक्ति श्रेष्ठ र विनोद श्रेष्ठलाई ती सामग्री आज हस्तान्तरण गर्नुभयो । उहाँले अस्ट्रेलियाको सिड्नीमा रहनुभएकी छोरी रञ्जु वाग्ले थापाले औँसीमा पठाएको एक हजार अस्ट्रेलियन डलर र छोरा सुगन्ध वाग्लेले पठाएको रु।१० हजारले ती सामग्री खरिद गरेर सहयोग गरेको बताउनुभयो । सामाजिक क्षेत्रमा क्रियाशील वाग्लेले यस अघि पनि विभिन्न सङ्घ संस्थालाई सहयोग गर्दै आउनु भएको छ । उहाँले भन्नुभयो “पहाडी क्षेत्रमा कोरोना सङ्क्रमितहरूलाई केही हदसम्म राहत होस् भनेर सहयोग गरेकी हुँ ।”
संस्थाका अध्यक्ष लामाले अस्पतालले हाल १० शय्याको निःशुल्क आइसोलेसन सञ्चालन गरेको बताउनुभयो । समुदाय स्तरबाट सञ्चालन भएको सो अस्पताललाई विभिन्न सङ्घ संस्थाले सहयोग गर्दै आएका छन् । लामाका अनुसार दुई जना चिकित्सक सहितको अक्सिजन सिलिन्डर राखेर आइसोलेसन चलाइएको छ । आइसोलेसनमा शय्या ५० पुर्‍याउने लक्ष्यसाथ काम अघि बढाएको उहाँले जानकारी दिनुभयो ।
सो अस्पतालले जिल्लाकै विकट मानिएको ईच्छाकामना गाउँपालिकासँगै तनहुँ, गोरखा र धादिङका बिरामीलाई समेत सेवा दिन सक्ने छ । इच्छाकामना चेपाङ समुदायको बाहुल्यता रहेको पालिका हो ।
रासस

प्रतिक्रिया राख्नुहोस्

Back to top button