तपाईँ सुन्दै हुनुहुन्छः

बागमती प्रदेशका सबै अस्पतालमा अक्सिजन प्लान्ट स्थापना गर्ने तयारी

मकवानपुर । बाग्मती प्रदेश सरकारले प्रदेश मातहतका सबै अस्पतालहरूमा अक्सिजन प्लान्ट स्थापना गर्ने तयारी गरेको छ ।
कोभिड महामारीलाई मध्यनजर गर्दै प्रदेशको सामाजिक विकास मन्त्रालयले अक्सिजन प्लान्ट स्थापनाका लागि टेण्डर आह्वान गरेको छ । अक्सिजन प्लान्ट खरिदका लागि मन्त्रालयले मङ्गलवार सार्वजनिक खरिद अनुगमन कार्यालय मार्फत एक हप्ताको समय सीमा राखेर टेण्डर आह्वान गरेको हो ।
मन्त्रालयले प्रदेश मातहतका काठमाडौँको टोखा, ललितपुरको बज्रबाराही, दोलखाको चरिकोट रामेछापको रामेछाप अस्पताल, काभ्रे मेथिनकोट, धादिङ अस्पताल, सिन्धुपाल्चोकको चौतारा अस्पताल र चितवनको बकुलहर अस्पतालमा अक्सिजन प्लान्ट स्थापना गर्न लागेको मन्त्रालयले जनाएको छ ।
यी अस्पतालहरूमा अक्सिजन अभाव नहोस् भनेर एक महिनाभित्र प्लान्ट स्थापना गरिसक्ने मन्त्रालयले जनाएको छ । यसअघि अक्सिजन प्लान्ट नभएका अस्पतालहरूमा पनि प्लान्ट निर्माण गर्ने निर्णय अनुरूप प्लान्ट निर्माण गर्न लागिएको मन्त्रालयले जानकारी दिएको छ । मन्त्रालयले टेन्डरको प्रक्रिया छोटो गर्न हालै आएको अध्यादेशले पनि सहज बनाएको हो ।
सामाजिक विकास मन्त्री सरस्वती बस्नेतले एक महिनाभित्र ती अस्पतालहरूमा अक्सिजन प्लान्ट स्थापना भइसक्ने बताउनुभयो । छोटो प्रक्रियाबाट खरिद प्रक्रिया सुरु गरेको बताउनुहुँदै उहाँले अक्सिजन प्लान्ट नभएका प्रदेश मातहतका सबै अस्पतालमा अक्सिजन प्लान्ट र १३ वटै जिल्लामा कम्तीमा एक÷एक वटा पीसीआर मेशिन राख्ने तयारी रहेको बताउनुभयो ।
प्रदेश मातहतका १३ मध्ये ६ वटा अस्पतालमा यस अघि नै अक्सिजन प्लान्ट सञ्चालनमा रहेको र बाँकी अस्पतालमा स्थापना गरेर प्रदेश मातहतका सबै अस्पतालहरूमा अक्सिजन प्लान्ट राख्न लागिएको उहाँले बताउनुभयो ।

प्रतिक्रिया राख्नुहोस्

Back to top button