तपाईँ सुन्दै हुनुहुन्छः

दुई वर्षभित्र हामी दुध उत्पादनमा आत्मनिर्भर बन्छौ : मन्त्री अर्याल

काठमाडौँ । कृषि तथा पशुपन्छी विकास मन्त्री पद्माकुमारी अर्यालले अबको दुई वर्षभित्र मुलुक दुध उत्पादनमा आत्मनिर्भर बन्ने बताउनुभएको छ ।
विश्व दूध दिवसको अवसरमा राष्ट्रिय दुग्ध विकास बोर्डले मङ्गलवार आयोजना गरेको भर्चुअल कार्यक्रममा बोल्दै मन्त्री अर्यालले त्यस्तो बताउनुभएको हो । हाम्रो प्राणको सुरुवात दूधबाट भएको भन्दै उहाँले अबको दुई वर्ष भित्र दूधमा आत्मनिर्भर बन्ने बताउनुभयो । उहाँले भन्नुभयो, ‘अबको दुई वर्षभित्र हामी दूधमा आत्मनिर्भर बन्छौँ । प्रति व्यक्ति ११ लिटर दूध अपुगको अहिलेको अवस्थालाई दुई वर्षभित्र पुरा गछौं ।’
मन्त्री अर्यालले दुग्ध र डेरी क्षेत्रलाई प्रोत्साहित गर्ने गरी बजेट ल्याएको समेत बताउनुभयो । दुग्ध क्षेत्रमा भएका तमाम समस्या समाधानतर्फ मन्त्रालय लागिरहेको भन्दै उहाँले दुध उत्पादन बढाउने र बजारीकरण गर्ने कार्यतर्फ मन्त्रालय लागिपरेको समेत बताउनुभयो । उहाँले भन्नुभयो, ‘दुग्ध क्षेत्रमा भएका समस्या समाधानतर्फ हामी लागिरहेका छौ । ती समस्या समाधान भएनन् भने दूध दिवस मनाएको कुनै औचित्य हुनेछैन ।’
मानव जीवनमा दूधको ठुलो महत्त्व रहेको भन्दै मन्त्री अर्यालले दुग्ध क्षेत्रको संवर्द्धनमा सबैको सङ्कल्प जरुरी रहेको समेत बताउनुभयो । कोभिड–१९ महामारीले दुग्ध क्षेत्रमा समस्या सिर्जना गरेको भन्दै उहाँले यस विषयमा मन्त्रीपरिषद्को बैठकमा समेत छलफल भएको र बजारसँग जोडिएका कुरालाई सहजीकरण गर्ने दिशातर्फ सरकार अगाडि बढेको बताउनुभयो ।
मन्त्री अर्यालले सरकारले दुध नीति अगाडि बढाएको भन्दै अहिलेको असहज परिस्थतीलाई विशेष अवस्थाको रुपमा बुझेर धैर्यता गर्न समेत किसानहरूलाई आग्रह गर्नुभयो । ‘हामी सामाजिक दूरी कायम राखेर आफ्ना गतिविधि सञ्चालन गर्ने ठाउँमा छौँ ।
असहजतालाई विशेष अवस्थाको रुपमा बुझेर धैर्यता गर्नुपर्छ । किसान दाजु भाइले पनि हेक्का राख्नुपर्छ’, मन्त्री अर्यालले भन्नुभयो, ‘व्यवसायबाटै पछि हट्ने सोच बनाउनु हुँदैन । डिडिसीबाट प्रस्ताव गएको छ । भुक्तानीसँग सम्बन्धित निर्णय हुन्छ । हामीले दूध नीति अगाडि बढाएका छौँ । संस्थानमा पनि नयाँ पदाधिकारी नियुक्ति गरेका छौँ । नयाँ कार्यक्रम अगाडि बढाइरहेको अवस्था छ ।’
दुग्ध क्षेत्रमा रहेका तमाम समस्या समाधान गरेर अगाडि बढ्ने बताउँदै उहाँले सरकार समस्याप्रति संवेदनशील भएर अगाडि बढ्ने बताउनुभयो । डिडिसीले दैनिक एक लाख लिटर दुध सङ्कलन गर्नुपर्ने अवस्था भए पनि अहिलेको अवस्थामा ९० हजार लिटर दैनिक दुध सङ्कलन गर्दै आएको भन्दै उहाँले बजार खुलेपछि खपत बढाउने गरी काम गर्न निर्देशन दिनुभयो ।

प्रतिक्रिया राख्नुहोस्

Back to top button